O PPdeG lamenta o aumento das cifras do paro no mes de setembro aínda que subeu a metade que no conxunto do Estado

Das 15 comunidades onde sube o paro, Galicia é a segunda onde menos aumenta en valores relativos e a cuarta con mellor comportamento en España


A creación de emprego constitúe un dos puntos fundamentais do programa electoral do PPdeG, con iniciativas como o Plan de Mellora da Empregabilidade

O Partido Popular de Galicia lamentou hoxe o aumento das cifras do paro no mes de setembro aínda que subiu a metade que no conxunto do Estado.

Segundo indican os populares galegos, Galicia rexistrou en setembro un total de 259.373 persoas desempregadas, o que supón un aumento do paro rexistrado  de 2.106 persoas, é dicir un 0,82% máis que o mes de agosto, mentres que en España o desemprego incrementouse en 79.645 persoas, é dicir, nun 1,72%.

Así mesmo, cómpre ter en conta que o paro subiu en 15 comunidades autónomas e, destas, Galicia é a segunda onde menos se incrementa en valores relativos. Polo tanto, é a cuarta comunidade de España con mellor comportamento fronte ao desemprego.

Como apunta o PPdeG, este lixeiro aumento rexistrado en setembro débese ao final da tempada estival e afecta exclusivamente ao sector servizos

Con respecto a isto, os populares galegos lembran que estamos ante un mes no que tradicionalmente se producen incrementos do paro (desde o ano 2002, tan só baixou en 2005 e só en 175 persoas). Ademais, este incremento é inferior ao rexistrado nos últimos catro anos.

Os populares galegos non van a renderse e seguirán traballando arreo contra a tendencia alcista do paro. De feito, o emprego constitúe un dos puntos fundamentais do seu programa para os vindeiros catro anos.
Neste sentido, propón a posta en marcha dun Plan de Mellora da Empregabilidade no que conflúan todas as políticas dirixidas á xeración de postos de traballo, á que se sumará un cambio de modelo do funcionamento do Servizo Público de Emprego e dos servizos prestados a través do mesmo para converter as súas oficinas en verdadeiros centros de colocación a disposición tanto dos empresarios como dos demandantes de emprego.

En Galicia, tal e como demostran as diferentes porcentaxes de desemprego entre esta comunidade e España, aplicáronse as medidas económicas que a comunidade necesitaba para poder controlar o déficit e destacar en solvencia. Agora, nesta Lexislatura que entra e unha vez conseguido este obxectivo, é o momento de impulsar o crecemento e iso conlevará máis oportunidades de traballo para os galegos.