Rueda anuncia para o primeiro sábado de campaña un acto en Pontevedra ao que asistirán 12.000 persoas

• Indica que Novas Xeracións presentará mañá ante Alberto Núñez Feijóo as súas propostas sobre a xuventude para integralas no programa electoral do PPdeG

•  Adianta que o domingo o partido presentará en Santiago un programa que, a diferenza do dos outros partidos, non será para gañar as eleccións senón para gobernar

Santiago de Compostela, 28 de setembro de 2012.- O secretario xeral do PPdeG, Alfonso Rueda, anunciou hoxe que o primeiro sábado de campaña os populares celebrarán un acto en Pontevedra ao que asistirán 12.000 persoas.

O secretario xeral do PPdeG avanzou que contarán con Mariano Rajoy para ese gran mitin e será o verdadeiro arranque da campaña electoral: un acto que se realizará co obxectivo de motivar a militantes e afíns, para que se dean conta de que é necesario mobilizarse.

Este evento, que Rueda definiu como o “acto talismán” ou o acto “de referencia” do PPdeG celebrarase co mesmo espíritu que no ano 2009 e no ano 2011.

Trátase, ademais, do acto que todo partido aspira a facer e só o PPdeG pode permitirse organizalo con esa envergadura e con esa concurrencia.

ACTO COA MOCIDADE E ACTO DO PROGRAMA ELECTORAL
O dirixente popular lembrou que Novas Xeracións celebrará mañá un acto con Alberto Núñez Feijóo para presentar o seu programa de propostas que posteriormente será incorporado, de xeito íntegro, no programa electoral do PPdeG.

Así mesmo, unha vez presentada a parte específica do programa referida á xuventude, o domingo o PPdeG presentará a totalidade do programa co que se presentará ás vindeiras eleccións e que, como destacou Rueda, será un programa de Goberno, pensado para aplicar e non para ser modificado por futuras coalicións.

Nese acto estarán presentes Feijóo e Pedro Puy, o coordinador do programa electoral, e desenvolverase no mesmo lugar e co mesmo escenario que o acto con Novas Xeracións, en aras da austeridade.

No que atinxe ao programa electoral, Rueda asegurou que non se trata dun documento para gañar as eleccións senón para gobernar, a diferenza do que sucede noutros partidos, que se ven obrigados a rachar os seus programas para facer pactos de goberno con outras formacións políticas.

Segundo Rueda, será un programa que se desenvolverá na súa integridade, sen renuncias de ningún tipo.